דילוג לתוכן המרכזי
חזרה לכל הפרקים

תהילים י״ג 6 פסוקים

תהילים פרק 13

י״ג 6 פסוקים למנצח מזמור לדוד

  1. לַמְנַצֵּחַ מִזְמוֹר לְדָוִד׃
  2. עַד־אָנָה יְהוָה תִּשְׁכָּחֵנִי נֶצַח עַד־אָנָה תַּסְתִּיר אֶת־פָּנֶיךָ מִמֶּנִּי׃
  3. עַד־אָנָה אָשִׁית עֵצוֹת בְּנַפְשִׁי יָגוֹן בִּלְבָבִי יוֹמָם עַד־אָנָה יָרוּם אֹיְבִי עָלָי׃
  4. הַבִּיטָה עֲנֵנִי יְהוָה אֱלֹהָי הָאִירָה עֵינַי פֶּן־אִישַׁן הַמָּוֶת׃
  5. פֶּן־יֹאמַר אֹיְבִי יְכָלְתִּיו צָרַי יָגִילוּ כִּי אֶמּוֹט׃
  6. וַאֲנִי בְּחַסְדְּךָ בָטַחְתִּי יָגֵל לִבִּי בִּישׁוּעָתֶךָ אָשִׁירָה לַיהוָה כִּי גָמַל עָלָי׃

מקור הטקסט

Tanach with Nikkud - נחלת הכלל. מאתר tanach.us, דרך ספריא. הטקסט לא נערך ולא שונה.